Лулахо, эвлахо ларар – коьрта декхар
Дика лулахо – тешам,
Вон лулахо эшам.
Нохчочун 1ер-дахарехь къаьсттина меттиг д1алоцуш ду лулахочуьнца лело деза г1иллакхаш. Нохчийн цкъа а къанлурдоцуш шира кица ду «Генарчу вешел, уллора лулахо тоьла», — олуш. Цуьнан маь1на ду хьан керта дика-вон деъча я накъосталла оьшуш меттиг т1ех1оьттича, хьалха хьуна орцах вог1ун верг лулахо хирг хилар. Тахана а ширделла дац вайн г1иллакхехь, нагахь лулахо шен кертахь дезо г1уллакх меттаххьадина воллуш гича, цунна г1о-накъосталлина улло волуш хилар. Лулахочун доьзале вон деъча, иза листина даллалца кевнаш д1адоьллу лулахоша. Лулахочунга вон деанехь – шега а вон деана бохург ду иза. Ткъа дика деъча, иштта диканехь а дакъалоцу дикачу лулахочо.
Эвлахь, лулахь стаг кхелхича, и стаг волчаьрга а ца кхочуьйтуш д1аверзаво вай. Генахь хан а яьккхина ц1авирзича, уггаре хьалха д1акхелхинчунна верасашка кадам бан араволу стаг. Лулахь, эвлахь бехачу нехан вовшашца ларам, г1иллакх хилар ду иза. «Эвлахойн, лулахойн безамах волучул– валар г1оле ю стагана», — олуш ду вай нохчаша.
Дай-наношца, йиш-вешица, лулахочуьнца, гергарчуьнца, дика хилар вайн Ислам-дино а лерина т1едиллина вайна. Иштта т1едиллина вайна буо-берашца, г1ийлачуьнца комаьрша, дика хилар а. «Ялсамане г1ур ма вац лулахочунна зулам дина стаг», — аьлла Дела дош ду олуш ду дешначу наха.
Вайн иштта хаза г1иллакхаш вайн дайша вайга схьадаларе терра, т1екхуьучу т1аьхьене д1адала доьналла хила декхарийлахь ду вай. Х1окху заманахь дуьне мел ду д1асадевлла, иэделла ду къаьмнаш. Вай дика девзачу кхечу къаьмнийн векалша хаза, дика ц1е йоккхуш долу вайн г1иллакхаш ц1ахь лардина ца 1аш, кхечу халкъийн векалшца а лардеш хила декхар ду х1ора нохчочун. Махкал арахьа нисделча, шайн оьзда г1иллакхаш, ламасташ д1атийса я дицдан ца дезий хууш хила веза наха юкъа волуш волу стаг. Муьлххачу къомана юкъахь вехаш хилчи а, вайн ларам алсам хирболу аг1о ю иза.
Нохчийн дахарехь уггаре а сийлахь меттиг д1алоцуш синмехалла ю – лулахочуьнца дика хилар. Нохчоллин уггаре дезачу г1иллакхех цхьаъ ду цунна тешаме, дог-ц1ена, лараме хилар. Т1екхуьучу ч1къорана уьш кхоччуш довзийтар – вайн декхар ду.
Дала т1аьхье беркате йойла вайн!
